Moderatori i njohur, Arjon Muça, ka ndarë për herë të parë një aspekt të jetës së tij që e kishte mbajtur privat deri më tani. Gjatë një interviste në një emision televiziv, ai zbuloi se është disleksik dhe se ka pasur gjithmonë vështirësi me leximin.

“Unë jam disleksik, një nga gjërat që s’e kam thënë kurrë në ekran. Kam probleme me leximin,” u shpreh ai, duke ndarë hapur këtë pjesë të jetës së tij me publikun.

Arjoni tregoi se e kuptoi këtë sfidë që në moshën 6-7 vjeç, gjatë shkollës fillore, kur vuri re se kishte vështirësi të mësonte leximin si bashkëmoshatarët e tij. “Kur të tjerët dinin të lexonin, unë s’dija. Jo se s’dija, por thjesht nuk e kuptoja mirë sesi funksiononte koncepti i leximit,” tha ai, duke shtuar se shkronjat shpesh i dukeshin si forma të çuditshme.

Për të përballuar këtë sfidë, Arjoni ka zhvilluar teknika të veçanta mësimi. “Unë mësoj përmendësh, dhe kur filloj të lexoj, truri im ka zhvilluar aftësinë të krijojë imazhe fotografike. E rishoh tekstin si një fotografi dhe gjej pikat kyçe,” shpjegoi ai.

Moderatori gjithashtu falënderoi kolegët e tij, veçanërisht Erjona Rusin, për mbështetjen që i kanë dhënë gjatë karrierës, sidomos në momente kur i është dashur të përballojë situata të vështira në transmetim. Ai vlerësoi ndihmën e saj gjatë leximit të dokumenteve të ndërlikuara, duke theksuar se mbështetja e saj ka qenë një shtysë e madhe për të.