Ish-banori i Big Brother Albania VIP 2, Armaldo Kllogjeri, i njohur si “Maestro”, do të kandidojë për deputet në listat e hapura të Partisë Demokratike për qarkun e Elbasanit.

Në një deklaratë publike, Kllogjeri u shpreh se nuk e kishte pasur ndonjëherë si ambicie të bëhej politikan, por e sheh si detyrim për të kontribuar në të ardhmen e vendit.

“Është pak e çuditshme situata ime që jam pjesë e politikës. Nuk jam person që kam ambicie për t’u bërë politikan. Kam qenë aktiv në vitet ’91, kur lindi PD, por s’kam qenë i zjarrtë me flamurin në dorë. Gjithsesi, në këtë ditë që jetojmë, e kam parë të arsyeshme që Shqipëria po ecën në një drejtim të paditur.”

Kllogjeri tha se, në një moment, kishte menduar të largohej nga vendi, por më pas vendosi të qëndrojë dhe të japë kontributin e tij në Partinë Demokratike.

“Mua më ka propozuar dega e PD në Gramsh. Kryesia e PD e miratoi që unë të isha pjesë e listave. Jam krenar që jam pjesë e listave të hapura.”

Ky vendim i tij ka ngjallur reagime të ndryshme, ndërsa mbetet për t’u parë se si do të pritet nga elektorati i qarkut të Elbasanit në zgjedhjet e ardhshme.