Presidenti serb Aleksandar Vuçiç ka reaguar ashpër pas arrestimit të zyrtarit serb në Kosovë, Igor Popoviç, duke e cilësuar atë si një provokim që rrezikon stabilitetin në Ballkanin Perëndimor. Në një intervistë për Pink TV, Vuçiç nuk ka kursyer sulmet ndaj Kryeministrit të Kosovës, Albin Kurti, të cilin e akuzoi se po përpiqet të destabilizojë rajonin.

“Arrestimi i fundit i Igor Popović tregon se Kurti e ka humbur mendjen dhe po përpiqet të shkaktojë konflikte në Ballkanin Perëndimor,” tha Vuçiç, duke paralajmëruar reagime dhe duke theksuar: “Terrori duhet të ndalet në një moment.” Ai gjithashtu bëri me dije se janë informuar të gjithë partnerët ndërkombëtarë për situatën, duke paralajmëruar pasoja të paparashikueshme.

Igor Popoviç, i cili shërben si Ndihmësdrejtor në Zyrën për Kosovën pranë Qeverisë së Serbisë, u arrestua më 19 korrik pas një fjalimi në Rahovec, ku e quajti Ushtrinë Çlirimtare të Kosovës organizatë terroriste dhe krahasoi veprimet e saj me ato të konfliktit në Gaza. Në fjalimin e tij, ai akuzoi institucionet ndërkombëtare për “dështim në drejtësi” dhe pretendoi se “autorët e krimeve ndaj serbëve nuk janë ndëshkuar asnjëherë”.

Ky arrestim dhe reagimet pas tij shtojnë tensionet në marrëdhëniet tashmë të ndjeshme ndërmjet Beogradit dhe Prishtinës.