Donald Tringa dhe Diamant Shkina janë arrestuar nga policia e Durrësit në kuadër të operacionit antidrogë të koduar “Repeat”. Sipas njoftimit të policisë, Tringa, 27 vjeç, kishte përshtatur lokalin që administroi për përdorim dhe shitje të kokainës. Shkina, 33 vjeç, ishte punësuar në mënyrë të paligjshme si bodyguard dhe shiste lëndën narkotike klientëve të lokalit.
Gjatë aksionit, u sekuestrua një sasi kokainë dhe një përforcues grushti. Ky operacion është pjesë e një serie goditjesh ndaj prodhimit dhe shitjes së lëndëve narkotike. Materialet procedurale janë kaluar Prokurorisë pranë Gjykatës së Shkallës së Parë të Durrësit për veprime të mëtejshme.
