Shkodër – Shkodra është tronditur sërish nga një atentat i rëndë me armë zjarri, i ndodhur paraditen e sotme në një lokal pranë godinës së Bashkisë. Ngjarja ka shkaktuar një bilanc tragjik: një i vrarë, tre të plagosur, ndërsa qyteti është mbërthyer nga frika dhe tensioni.
Sipas burimeve zyrtare, pre e atentatit kanë rënë Erogen Vaso, i njohur edhe si Erogen Brajoviç, dhe Armando Pali. Ky i fundit ka humbur jetën në vendngjarje, ndërsa Erogen Vaso ndodhet në gjendje kritike dhe është dërguar me urgjencë në spitalin e Shkodrës.
Gjithashtu, në ngjarje janë plagosur një grua dhe kamarieri i lokalit, të cilët, sipas hetimeve paraprake, janë viktima të rastësishme që janë kapur nga plumbat e breshërisë.
Erogen Vaso, një emër i njohur për policinë dhe politikën
Erogen Vaso alias Brajoviç, është vëllai i Denis Brajoviçit, aktualisht i arrestuar, dhe një emër i njohur për policinë. Ai është lidhur më herët me grupin e Bajrave në Shkodër dhe ka pasur përplasje të hershme me ligjin.
Vaso ka qenë anëtar i Këshillit Bashkiak të Shkodrës, duke u zgjedhur fillimisht nën siglën e Partisë Bashkimi për të Drejtat e Njeriut (PBDNJ), e drejtuar nga Vangjel Dule. Por emri i tij ka dalë shpesh edhe në dosje kriminale. Në vitin 2007, ai është akuzuar për veprën penale të “shtrëngimit me anë të kanosjes ose dhunës për përfitim pasurie”, e njohur ndryshe si gjobëvënie.
Pista e hetimeve: Konflikt mes bandave rivale
Burime nga hetimet bëjnë me dije se policia po shqyrton disa pista, përfshirë edhe mundësinë e një hakmarrjeje të mundshme mes grupeve kriminale.
Nuk përjashtohet që atentati të lidhet me aktivitetin e grupit të Bajrave, ku më herët është përfshirë edhe vëllai i viktimës, Denis Brajoviç, i arrestuar për vrasjen e Ndoj Boricit.
Forcat e policisë kanë rrethuar zonën, kanë sekuestruar kamerat e sigurisë dhe janë në kërkim të autorëve, të cilët janë larguar menjëherë pas atentatit.
Shkodra në alarm: tre ekzekutime brenda dy javësh
Kjo ngjarje e rëndë vjen vetëm pak ditë pas ekzekutimeve të tjera që kanë tronditur Shkodrën.
• Më 4 shtator, u vra Kristian Kola, 34 vjeç, në një atentat të mirëorganizuar.
• Më 28 gusht, Piro Prroni u ekzekutua me armë zjarri në fshatin Abat të Shalës.
Seria e vrasjeve ka thelluar klimën e pasigurisë dhe ka rritur frikën për një përshkallëzim të konflikteve mes bandave rivale në qytetin verior.
Policia dhe Prokuroria e Shkodrës janë vënë në alarm maksimal, ndërsa forcat RENEA pritet të përfshihen në operacionet e kërkimit. Hetimet po vijojnë intensivisht për të zbardhur plotësisht ngjarjen dhe për të identifikuar autorët e atentatit.
