Ekzekutimi i 27-vjeçarit Klaudio Prendi, djali i ish-gjyqtarit Fran Prendi, është marrë në shqyrtim nga Prokuroria e Posaçme Kundër Korrupsionit dhe Krimit të Organizuar (SPAK). Ngjarja ndodhi pranë zonës së Xhamllikut në Tiranë, ku Prendi u vra me armë zjarri me silenciator sapo kishte dalë nga një lokal, ku ishte i shoqëruar me tre punonjës policie.

Sipas burimeve zyrtare, hetimet janë përqendruar në dyshimet se autorët e atentatit janë pjesë e një grupi të strukturuar kriminal, i përfshirë edhe në krime të tjera të rënda. Klaudio Prendi u qëllua me breshëri armësh nga një automjet tjetër, ndërsa sapo kishte hipur në makinën e tij tip “Mercedes”.

Policia ka ngritur dy pista kryesore hetimi:

1.Hakmarrje për shkak të detyrës së të atit, ish-gjyqtar Fran Prendi, i cili mund të ketë krijuar armiq gjatë ushtrimit të funksionit të tij.

2.Konflikt personal që i riu mund të ketë pasur me eksponentë të organizatave kriminale, të cilat mund të kenë urdhëruar ekzekutimin e tij.

Ndërkohë, hetimet po vijojnë për të zbardhur identitetin e autorëve dhe për të dokumentuar lidhjet e tyre me grupet kriminale të dyshuara.