Autoriteti i Konkurrencës ka mbyllur monitorimin e tregut të autoshkollave, duke konfirmuar se autoshkollat kanë respektuar vendimin e Komisionit të Konkurrencës për ndalimin e rritjes së çmimeve, siç ishte parashikuar në një akt-marrëveshje të shkurtit 2023.
Autoriteti i Konkurrencës njofton se pas përfundimit të monitorimit të tregut të shërbimit të përgatitjes dhe pajisjes me leje drejtimi, në përputhje me kategoritë e lejeve drejtimi, dëshmisë ose certifikatës, ka rezultuar se autoshkollat kanë respektuar vendimin e VKK nr. 970/2023. Ata nuk kanë aplikuar rritjen e tarifave sipas Akt Marrëveshjes nr. 2729 prot., datë 13.02.2023, e cila u vlerësua si një akt marrëveshje në kundërshtim me ligjin për mbrojtjen e konkurrencës.
Për këtë arsye, Komisioni i Konkurrencës me Vendimin nr.1071, datë 19.04.2024, ka vendosur mbylljen e procedurës së monitorimit të zbatimit të VKK nr. 970, datë 24.03.2023. Akti Marrëveshjes nr. 2729, datë 13.02.2023, i lidhur ndërmjet Drejtorisë së Përgjithshme të Shërbimeve të Transportit Rrugor, Shoqatës “Kombëtare të Autoshkollave”, Shoqatës së Autoshkollave “Siguria në rrugë” dhe Drejtorisë së Përgjithshme të Tatimeve, u vlerësua si një marrëveshje e ndaluar.
Monitorimi i tregut ka vërtetuar që zbatimi i kësaj marrëveshjeje do të çonte në praktika të njëjta në çmimet/tarifat e pagesës për përgatitjen dhe fitimin e lejeve drejtimi, dëshmisë ose certifikatës, duke penguar, kufizuar dhe shtrembëruar konkurrencën në treg.
Gjatë monitorimit të tregut, çmimet e ofrimit të shërbimeve të mësimit teorik dhe trajnimit praktik për pajisjen me leje drejtimi variojnë nga 23.000 lekë deri në 45.000 lekë. Kryesisht, autoshkollat në qarkun e Tiranës ofrojnë çmime më të larta krahasuar me ato në qarqe të tjera të vendit. Ndryshimet në çmim janë rezultat i numrit të orëve mësimore, kostove të ndryshme dhe materialeve mësimore.
Në periudhën e monitorimit, çmimet e shërbimit të përgatitjes dhe pajisjes me leje drejtimi nuk kanë pësuar rritje. Ministria e Infrastrukturës dhe Energjisë ka miratuar paraprakisht tarifat e reja të shërbimeve të lejedrejtimit dhe shërbimeve të certifikatës së aftësisë profesionale, bazuar në analizën e kostos, pas 23 vitesh.
Në përfundim të monitorimit, Autoriteti i Konkurrencës ka vërejtur se autoshkollat nuk kanë aplikuar rritje të tarifave për shërbimet e tyre, duke i respektuar kështu vendimin e Komisionit të Konkurrencës për të parandaluar veprimtari antikonkurruese në treg.
