Çështja e dhunës në një lokal në Vlorë, ku një polic goditi kamerierin 18-vjeçar Ron Balaj, ka marrë një tjetër kthesë pas reagimit të avokatit të efektivit, Kujtim Cakrani. Ky i fundit ka publikuar pamje të tjera që sipas tij tregojnë momentet kur klienti i tij, Ardian Isufi, është dhunuar nga një grup prej 15 personash jashtë ambienteve të lokalit.

Në një reagim të gjatë, avokati Cakrani thekson se videot tregojnë qartë agresionin e ushtruar ndaj policit pas incidentit fillestar:

“Në video dallohen qartë personat që kanë dhunuar policinë, që në fakt nuk kanë qenë as dy as tre, por 15 persona me mjete të forta. Qytetarët janë bërë preha e një videoje të shkurtër ku shihet vetëm momenti kur polici e godet kamerierin, ndërsa pjesa tjetër është fshehur,” – shkruan ai.

Pamjet e publikuara nuk janë shumë të qarta, por në një cep të videos dallohet një përplasje mes disa personave.

Cakrani, i cili deri më tani nuk është shprehur për dhunimin që klienti i tij i ka bërë të riut në vendin e punës, këmbëngul se pas këtij episodi, polici është dhunuar rëndë dhe se përgjegjësit duhet të përballen me drejtësinë.

Në një reagim të mëparshëm, avokati kishte deklaruar se klienti i tij “nuk e dhunoi, por e goditi me dy shpulla” 18-vjeçarin, duke e cilësuar reagimin e mëpasshëm të qytetarëve si të pajustifikuar.

Ndërkohë, polici Ardian Isufi ndodhet në spital, ndërsa ngjarja po hetohet nga autoritetet.