Emri i tij është Taulant Pasho, është 33 vjeç dhe për momentin ndodhet në një burg në Zvicër. Ai është djali i Shpëtim dhe Teuta Pashos, çiftit shqiptar, trupat e të cilëve u gjetën të shpërndarë në katër valixhe në një fushë pranë burgut të Soliçianos në Firence të Italisë.

Ngjarja ka tronditur Italinë dhe Shqipërinë, që kur u mësua se trupat i përkasin çiftit shqiptar. Një tatuazh në formë spirance në trupin e Shpëtimit ka ndihmuar në zbardhjen e identitetit. Një kujtim nga koha kur ishte pjesë e ushtrisë, në marinën shqiptare në vitet ’79-’82.

Taulanti ishte arrestuar për drogë në Itali dhe priste që të dilte ditën kur edhe u zhdukën prindërit e tij.

Avokatja e tij, Sabrina del Fio ka rrëfyer se çfarë i ka thënë Taulanti.

“Jam i shqetësuar, prindërit e mi janë zhdukur prej ditësh, askush nuk e di ku janë. Nuk përgjigjen në telefon, është e çuditshme, prindërit e mi nuk sillen kështu,”kujton avokatja.

“Taulanti më telefonoi për një kafe në gjykatë në Firence. Ishte hera e fundit që e pashë. Folëm për problemet e tij ligjore, por më tregoi edhe për familjen e tij. Më tha se ishte sjellje e çuditshme e prindërve të tij, pasi ata i përgjigjen gjithmonë në telefon”.

Avokatja kujton sërish: “Më ka marrë edhe para dy ose tre vitesh. Taulanti më telefonoi nga një numër anonim. Ishte telefonatë e shkurtër. Më pyeti për akuzat ndaj tij. Më tha se nuk kishte para dhe se ishte i dëshpëruar për fatin e prindërve të tij, për të cilët nuk dinte asgjë”.

Taulant Pasho doli në arrest shtëpie, por u largua nga Italia duke lënë aty dy motrat dhe një të dashur, e cila kishte ngritur një ankesë ndaj tij.

Tashmë është në burg në Zvicër, jo për çështje droge, por për vjedhje.