Qyteti i Vlorës pritet të përfshihet nga mot i keq në ditët në vijim, me reshje të dendura shiu dhe rrezik për përmbytje në disa zona. Paralajmërimi është bërë publik nga Bashkia e Vlorës, e cila iu ka bërë thirrje qytetarëve të tregohen të kujdesshëm dhe të marrin masa paraprake.

“Referuar njoftimit të Qendrës Kombëtare për Parashikimin dhe Monitorimin e Rreziqeve Natyrore, nga data 17 deri më 21 tetor, qyteti i Vlorës parashikohet të përfshihet nga reshje shiu mesatare deri lokalisht intensive.
Ju lutemi të tregoheni vigjilentë për çdo situatë dhe të respektoni thirrjet dhe këshillat e autoriteteve.
Jeni të lutur të shmangni parkimin e automjeteve në zonat që paraqesin problematika.
Grupet tona të punës do të jenë në gatishmëri të plotë. Faleminderit!”, thuhet në njoftimin zyrtar të bashkisë.

Autoritetet vendore kanë theksuar se ekipet emergjente do të jenë në terren gjatë gjithë periudhës për të menaxhuar situatat e mundshme të vështira, ndërsa qytetarëve u kërkohet të raportojnë menjëherë çdo problem që lidhet me rrëshqitje dherash, bllokim kanalizimesh apo përmbytje.