Bashkimi Evropian (BE) ka refuzuar pretendimet e Serbisë se Perëndimi ka ndikuar në protestat dhe tenton të ndërhyjë në procesin zgjedhor të vendit, duke i krahasuar ato me “narrativën ruse.” Zëdhënësi i BE-së, Peter Stano, theksoi se këto akuza nuk kanë asnjë bazë dhe janë pjesë e propagandës ruse për të penguar rrugën e Serbisë drejt anëtarësimit në BE.

Politikanët serbë kanë akuzuar Perëndimin për mbështetje në protestat kundër parregullsive zgjedhore. Kryeministrja Ana Bërnabiq e ka quajtur këtë një “përpjekje për destabilizim të Serbisë.” Zëdhënësi Stano i bëri thirrje Serbisë të shmangë retorikën e nxitur nga Rusia kundër BE-së dhe të mbajë lidhjet me vlerat dhe principet e Bashkimit Evropian.

Pas zgjedhjeve të dhjetorit në Serbi, ka pasuar një sërë protestash me akuzat për vjedhje elektorale nga Partia Progresive Serbe (SNS). Zyra e OSBE-së për Institucione Demokratike dhe të Drejtat e Njeriut (ODIHR) konfirmoi parregullsitë dhe keqpërdorimet në zgjedhje. Shtetet e Bashkuara të Amerikës dhe eurodeputetët kanë bërë thirrje për hetim të pavarur për të zbardhur çështjet e raportuara. BE ka thirrur për qetësi, dialog dhe hetim të rregullt të ankesave për parregullsi zgjedhore.

“Sa i përket zgjedhjeve në Serbi dhe asaj që pasoi pas tyre, BE ka bërë thirrje për të gjithë aktorët për qetësi dhe dialog. Ankesat për parregullsi zgjedhore duhet të hetohen në mënyrë të duhur dhe të adresohen. Kemi qenë të qartë se, përderisa vlen e drejta për protesta paqësore, dhuna nuk është zgjidhje dhe është e pa pranueshme. Veprimet e policisë duhet të jenë proporcionale dhe të respektojnë të drejtat themelore dhe sundimin e ligjit”, shtoi Stano