Ligji i ri do të bëjë që pronarët e automjeteve elektrike në Evropë të mund të udhëtojnë në të gjithë bllokun me mbulim të plotë, duke i lejuar ata të paguajnë lehtësisht për rimbushjen e automjeteve të tyre pa aplikacione ose abonime.

Shtetet e BE ranë dakord për një ligj të ri të martën që do të mundësojë ndërtimin e karikuesve shtesë të veturave elektrike dhe më shumë stacione karburanti për karburantet alternative përgjatë autostradave kryesore në të gjithë bllokun.

Legjislacioni i ri përfshin objektiva specifike që BE-ja duhet të përmbushë deri në fund të 2025 dhe 2030, duke përfshirë ndërtimin e stacioneve të rimbushjes së shpejtë prej të paktën 150 kË për makina dhe furgona çdo 60 km përgjatë korridoreve kryesore të transportit të BE-së – ajo që njihet si rrjeti trans-europian i transportit (TEN-T). Rrjeti konsiderohet si korridori kryesor i transportit të BE-së.

Futja e këtyre stacioneve do të fillojë “nga viti 2025 e tutje”, sipas Këshillit të BE-së.

Automjetet e rënda do të duhet të presin më gjatë. I gjithë rrjeti i rimbushësve për këto automjete me një fuqi minimale prej 350 kË pritet të përfundojë deri në vitin 2030.

Në të njëjtin vit, autostradat do të pajisen edhe me stacione karburanti me hidrogjen për makina dhe kamionë. Në të njëjtën kohë, portet detare do të duhet të sigurojnë energji elektrike në breg për anijet elektrike.

Këshilli i BE-së gjithashtu dëshiron t’ua bëjë më të lehtë drejtuesve të automjeteve elektrike që të paguajnë për rimbushjen e automjeteve të tyre, duke i lejuar ata të bëjnë me lehtësi pagesat me karta ose të përdorin pajisje pa kontakt pa pasur nevojë për abonime ose aplikacione.