Drejtuesi politik i Partisë Demokratike për Tiranën, Belind Këlliçi, ka folur për News 24 pak para nisjes së protestës së organizuar nga Partia Demokratike.

Në fjalën e tij, Këlliçi theksoi se Shqipëria po përballet me një krizë të thellë ekonomike, ndërsa numri i të rinjve që largohen nga vendi po rritet ndjeshëm.

“Shqipëria, përveçse është plakur, edhe është mpakur. Ekonomia e shqiptarëve është sot në ditën më të zezë. Çdo qytetar shqiptar duhet të vijë sot në protestë.” – deklaroi ai.

Duke akuzuar qeverinë për korrupsion dhe keqmenaxhim, Këlliçi përmendi rastin e Tunelit të Llogarasë, duke e cilësuar atë si një aferë flagrante ku, sipas tij, janë vjedhur 50 milionë euro.

Ai gjithashtu u ndal te premtimet e PD-së për rritjen e pagave, duke thënë se:
“Ne kemi premtuar pagë minimale 500 euro dhe mesatare 1200 euro.”

Këlliçi pranoi se çdo parti politike mund të ketë bërë gabime, por sipas tij, PD “nuk ka kryer vjedhje të mëdha flagrante” si ato që ai pretendon se kanë ndodhur gjatë qeverisjes së Partisë Socialiste.

Protesta e sotme e Partisë Demokratike pritet të mbledhë qytetarë të shumtë, të cilët kërkojnë ndryshim dhe llogaridhënie për çështjet ekonomike dhe qeverisjen.