Për herë të parë që prej marrjes së dosjes nga SPAK, Sali Berisha u paraqit sot në Prokurorinë e Posaçme për të dhënë llogari lidhur me ngjarjen e 21 janarit 2011, ku u vranë 4 protestues para Kryeministrisë. Ish-kryeministri mbërriti në ambientet e SPAK në orën 09:00, duke shënuar momentin më të rëndësishëm të këtij hetimi të ri.

U thirr tre herë, dy fletëthirrje i refuzoi

SPAK i dërgoi Berishës dy fletëthirrje më 3 dhe 7 nëntor, të cilat ai refuzoi t’i merrte, pavarësisht se iu lanë në tre adresa: në banesë, selinë e PD-së dhe në Kuvend. Të tretës nuk mund t’i shmangej, pasi iu dorëzua në dorë teksa shkoi në SPAK për çështjen “Partizani”.

Fillimisht, dëshmia u parashikua për të premten, por u shty me kërkesë të Berishës, i cili pretendoi se do të ndodhej jashtë vendit. Më pas ai deklaroi publikisht se do të paraqitej.

Hetimi: nga “vrasje nga pakujdesia” te “krim shtetëror”

Ky zhvillim vjen rreth 1 vit e gjysmë pasi SPAK mori në dorë dosjen e vrasjes së protestuesve Hekuran Deda, Ziver Veizi, Faik Myrtaj dhe Aleks Nika.

Për vite me radhë, drejtësia e vjetër e trajtoi ngjarjen si “vrasje nga pakujdesia”, duke çuar në gjyq vetëm ish-komandantin e Gardës, Ndrea Prendi, dhe efektivin Agim Llupo, të dënuar me 1 dhe 3 vite burg.

Në mars 2024, pas vendimit të Gjykatës Evropiane të të Drejtave të Njeriut, Gjykata e Lartë urdhëroi SPAK-un të hetojë 21 Janarin si krim shtetëror, duke kërkuar zbardhjen e përgjegjësive të funksionarëve të lartë, përfshirë Berishën, ish-ministrin e Brendshëm Lulzim Basha (i thirrur më herët), si dhe Ndrea Prendin.

Në korrik 2024, SPAK regjistroi procedimin për tre akuza të rënda:
• “Vrasje në rrethana të tjera cilësuese” në bashkëpunim
• “Shpërdorim detyre”
• “Pengim i zbulimit të së vërtetës”

Momenti më i rëndësishëm i hetimit

Dëshmia e sotme e Berishës shihet si një pikë kyçe për zbardhjen e një prej ngjarjeve më të rënda politike në historinë e tranzicionit shqiptar. Hetimet pritet të shoqërohen me thirrje të tjera dhe veprime të reja procedurale nga SPAK.

Dosja 21 Janari, e cila qëndroi për 13 vite e pazbardhur, po rikthehet kështu në fokus me ritme të reja dhe me presion të shtuar publik e ndërkombëtar.