Kryetari i Partisë Demokratike, Sali Berisha, në fjalimin e tij gjatë tubimit të sotëm, iu referua kërcënimit të gazetarit Sokol Balla ndaj kryetarit të grupit parlamentar të PD-së, Gazment Bardhi, duke e krahasuar me fatin e Ervis Martinajt. Berisha dërgoi një paralajmërim të fortë për kryeministrin Edi Rama, duke theksuar se nëse preket qoftë edhe një fije floku e Bardhit apo e ndonjë deputeti të PD-së, për Ramën nuk do të ketë asnjë vend të sigurt.

Sipas Berishës, Rama nuk do të mund t’i mbyllë gojën opozitës për çështjet që lidhen me krimet dhe trafiqet që ai pretendon se përfshijnë kryeministrin dhe vëllain e tij, Olsi Rama. Ai shtoi se kërcënimet nuk do të ndalojnë denoncimin e këtyre akuzave dhe se ata që i bëhen zëdhënës një regjimi të tillë do të barazohen me kriminelët.

Berisha u shpreh: “Edi Rama ka lëshuar dje një kërcënim me jetë ose me burg me gojën e zëdhënësit të tij, Sokol Balla, për kryetarin e grupit parlamentar të PD, Gazment Bardhi. Guxon dhe i prek një qime floku të Gazment Bardhit ose të çdo deputeti, vend mbi tokë nuk do kesh. Nuk të mbrojnë dot as tunelet e Dajtit, as shpellat e Malit me Gropa.”

Në vijim të fjalimit, Berisha theksoi se opozita nuk do të heshtë për trafiqet dhe krimet e pretenduara që lidhen me qeverinë dhe vëllain e kryeministrit, duke shtuar se çdo përpjekje për të mbyllur gojën e opozitës është e kotë.