Kreu i Partisë Demokratike, Sali Berisha, ka reaguar jashtë Parlamentit pas miratimit të projektligjit për barazinë gjinore, i cili mori 77 vota pro.

Berisha kritikoi mënyrën e miratimit, duke theksuar se Parlamenti është kthyer në një institucion formal që nuk respekton rregullat bazë. Ai akuzoi mazhorancën për “instalim të ideologjisë postmarksiste”, që sipas tij është ideologjia më e rrezikshme e kohës:
“E vendosën pa debat, të tmerruar nga vota dhe qëndrimi i tyre. Faktikisht parlamenti është thjesht formal sepse nuk po respektohet asnjë nga rregullat bazë të tij. Ishte një moment ky për të debatuar gjerësisht për lirinë që i hap rrugën instalimit të ideologjisë postmarksiste… PD është e përcaktuar absolutisht kundër çdo diskriminimi gjinor dhe ka votuar një ligj ndër më të mirët që ekziston, kurse ligji i sotëm përmbys rendin juridik të Shqipërisë, kushtetutën e vendit, kodet e vendit dhe ligje të tjera,” deklaroi Berisha.

Ai theksoi se tani fjalën e kanë qytetarët shqiptarë, duke lënë të nënkuptohet se opozita do të vazhdojë të ndjekë këtë çështje në publik dhe politikisht.