Kryetari i Partisë Demokratike, Sali Berisha, vazhdoi takimet elektorale të tij, ndryshe nga Partia Socialiste, e cila anuloi aktivitetet për shkak të shpalljes së ditës së zisë kombëtare në nder të Papa Françeskut. Pas një minute heshtje për nder të Papa Françeskut, Berisha mori pjesë në një konferencë me gratë, ku e shfrytëzoi mundësinë për të sulmuar ministrat e qeverisë Rama.

Berisha i krahasoi ato me “badigardët e Gadafit” dhe akuzoi se ministrat nuk kanë paraqitur asnjë program për mbështetje të grave dhe vajzave në Shqipëri. Ai theksoi se, pavarësisht emërimit të një numri të madh grash ministre në kabinetin e Edi Ramës, asnjë masë e rëndësishme nuk është ndërmarrë për të mbrojtur dhe promovuar të drejtat e grave.

“Është e vërtetë se Edi Rama emëroi ministre me shumicë në kabinetin e tij dhe ju e dini, unë u ngrita në parlament dhe e përgëzova me sinqeritet. Por çfarë mund të them unë pas 4 vitesh? 4 vite, në mënyrë absolute, nuk kanë shtruar një çështje të vetme në promovim, në favor, në mbrojtje të grave dhe vajzave në Shqipëri. Asnjë”, tha Berisha.

Ai përmendi një moment kur qeveria shqiptare mori një grant prej 60 milionë eurosh nga qeveria franceze, dedikuar mbështetjes së grave, por Berisha akuzoi se qeveria nuk ka përdorur asnjë fond të këtij granti. Sipas tij, edhe kur propozoi të shtoheshin fondet për këtë program, u refuzua.

“U ngrita dhe propozova që t’i shtojmë edhe ne, t’i bëjmë 100 milionë dhe ky është një shans për të ndihmuar vajzat dhe gratë. Absolutisht jo. I trupëzuan në buxhet dhe nuk lanë asnjë qindarkë. Dhe të gjithë ato zonja ishin aty dhe nuk folën. U bë e famshme ajo që u thashë se ju silleni si badigardet e Gadafit, të cilat i thurnin lavdi Gadafit”, tha Berisha, duke shtuar se ky është një lloj mizoginie që ndalon zhvillimin dhe mbështetjen e grave dhe vajzave në Shqipëri.