Kryetari i Partisë Demokratike, Sali Berisha, ka uruar sot 35-vjetorin e gazetës “Rilindja Demokratike”, duke e vlerësuar si një nga simbolet e pluralizmit dhe të lirisë së fjalës në Shqipëri.

Në një mesazh për shtyp, Berisha theksoi rëndësinë historike të gazetës dhe të rolit të saj në mbrojtjen e demokracisë: “Në trashëgiminë tonë të lirisë, sot ne kremtojmë një datë ndër më të shënuarat, 35-vjetorin e botimit të gazetës së parë opozitare pas 45 vitesh monizëm total. Kjo nuk është festa e një gazete, është festa e pluralizmit të mendimit, e fjalës së lirë dhe e jetës me dinjitet”.

Ai kritikoi ashpër mediat e kontrolluara nga qeveria, që sipas tij shërbejnë si instrument i krimit dhe i organizatave kriminale, duke manipuluar publikun dhe glorifikuar të keqen. “Kurrë më parë kartelet e drogës dhe organizatat kriminale nuk kanë pasur kaq ndikim në mediat shqiptare. Por sot ka edhe gazetarë të guximshëm që, shpesh pa pagë, luftojnë për të treguar të vërtetën dhe për të hetuar krimet e regjimit”, shtoi Berisha.

Ai garantoi se programi i Partisë Demokratike bazohet mbi mbrojtjen e lirisë së fjalës, të mendimit dhe të dinjitetit të gazetarëve.