Pas reagimeve të shumta në rrjetet sociale për projektin e tij të fundit muzikor, “Rrëfim”, Bes Kallaku ka vendosur të sqarojë publikisht çdo keqkuptim.

Përmes një Instastory të gjatë, aktori dhe këngëtari theksoi se ky projekt është më i ndjeri i tij dhe se nuk ka pasur aktrim: “Në këtë projekt kam qenë vetëm unë. Pa maska. Pa skenar. Vetëm unë dhe e vërteta ime.”

Ai shtoi se ka lënë pas të shkuarën, duke mos i drejtuar mesazhe askujt nga kapitujt e mëparshëm: “Unë prej kohësh e kam mbyllur kapitullin me të shkuarën time, kapitull nga i cili m’u desh kohë të kuptoja sa i fituar dola.”

Bes Kallaku falënderoi gjithashtu motrën e tij, Ana Kallakun, për mbështetjen gjatë periudhave të vështira, dhe surprizoi ndjekësit me një dedikim të ndjerë për partneren e tij aktuale: “Dua të falënderoj njeriun e zemrës sime, trëndafilin tim në kohë lufte, që më ktheu paqen, buzëqeshjen, shkëlqimin e syve të mi dhe mbi të gjitha versionin më të mirë të vetes sime…”

Me këtë mesazh, Bes Kallaku konfirmon se “Rrëfim” është jo vetëm një projekt muzikor, por një kapitull i ri i jetës së tij personale, i fokusuar tek e tashmja dhe dashuria që ka gjetur përsëri.