Qeveria siriane ka njoftuar se ka marrë kontrollin e të gjitha bazave ushtarake që më parë përdoreshin nga forcat amerikane, të cilat për vite me radhë kanë operuar në luftën kundër Shtetit Islamik.

Në një deklaratë zyrtare, Ministria e Jashtme e Sirisë konfirmoi “dorëzimin e plotë” të këtyre bazave tek autoritetet vendase, duke theksuar se procesi është realizuar në koordinim mes Damaskut dhe Uashingtonit.

Sipas autoriteteve, ky zhvillim shënon një fazë të re në riorganizimin e pranisë ushtarake të huaj në vend, ndërsa forcat e koalicionit ndërkombëtar të udhëhequr nga SHBA janë tërhequr gradualisht nga disa zona strategjike në verilindje të Sirisë.

Së fundmi, trupat siriane kanë hyrë në bazën ajrore Kasrak, në provincën Hasakah, një zonë me rëndësi strategjike pranë kufijve verilindorë të vendit. Sipas një zyrtari të Ministrisë së Mbrojtjes, baza ishte tashmë e zbrazët në momentin e hyrjes së forcave siriane.

Autoritetet në Damask e kanë cilësuar këtë si një hap të rëndësishëm në forcimin e kontrollit shtetëror mbi territorin, ndërsa nuk janë dhënë ende detaje të tjera mbi kushtet e marrëveshjes së tërheqjes apo të ardhmen e pranisë ndërkombëtare në vend.