“Blutë” angleze po bëjnë thirrje për informacion për gjetjen e një shqiptari të raportuar të zhdukur në Leeds, i quajtur Adriatik Buci, i cili nuk është parë që nga vera e vitit 2023.

Policia britanike po bën apel për ndihmë nga publiku dhe dëshiron të flasë me këdo që ka informacion rreth vendndodhjes së Adriatik Bucit. 39-vjeçari përshkruhet si një person i bardhë, tullac, me mjekërr dhe sy kafe.

Adriatik Buci u pa për herë të fundit duke veshur një xhup gri me mëngë të përveshura mbi bërryla dhe pantallona të shkurtra të bardha, ndërsa kishte këpucë bardh e zi.

Hetimet janë në vazhdim, dhe policia thekson se ai ka lidhje me zonat e qendrës së qytetit Gipton dhe Leeds. Gjithashtu, dihet se herë pas here ai kthehet në vendlindjen e tij, Shqipëri.

Zëdhënësi i policisë së West Yorkshire bëri thirrje për të gjithë ata që kanë informacion apo kanë parë diçka që mund të ndihmojë në gjetjen e Adriatik Bucit të kontaktojnë Policinë e Qarkut të Leeds në numrin 101 duke referuar referencës së policisë 13230425885 ose të përdorin faqen e internetit për të ndarë informacionin e tyre.