Ambasada e Britanisë së Madhe në Kosovë ka përgëzuar koordinimin mes Forcës së Sigurisë së Kosovës (FSK) dhe KFOR-it gjatë operacionit të kërkim-shpëtimit në Liqenin e Ujmanit, ku më 29 korrik u gjet trupi i pajetë i një personi që kishte rënë nga ura dy ditë më parë.

Në një reagim zyrtar, Ambasada thekson se ky operacion dëshmon aftësitë e FSK-së në misionet humanitare dhe përputhjen e veprimeve të saj me marrëveshjet e arritura me KFOR-in.

“Ne e përgëzojmë KFOR-in për ofrimin e mbështetjes dhe sigurisë gjatë gjithë operacionit dhe i shprehim ngushëllime familjes së viktimës. Britania e Madhe mbështet plotësisht misionin e KFOR-it për të kontribuar në një mjedis të sigurt për të gjithë njerëzit dhe komunitetet në Kosovë. Bashkëpunimi i ngushtë mes KFOR-it, FSK-së dhe reaguesve të tjerë të sigurisë përfshirë Policinë e Kosovës dhe EULEX-in është jetik për suksesin e këtij misioni,” thuhet në reagim.

FSK-ja u përfshi në operacion pas autorizimit të KFOR-it, siç parashikon marrëveshja e vitit 2013 mes NATO-s dhe Qeverisë së Kosovës, që kërkon miratim për çdo dislokim të trupave të FSK-së në komunat veriore të banuara me shumicë serbe.

Liqeni i Ujmanit ndodhet në Zubin Potok, një nga katër komunat veriore të Kosovës me shumicë serbe.