Asambleja e Partisë Socialiste u zhvillua mbrëmjen e sotme në Vlorë, ku u prezantua zyrtarisht Brunilda Mersini si kandidate për kryetare të Bashkisë së Vlorës.

Mbledhja u drejtua nga drejtuesi politik i qarkut, Blendi Çuçi, në prani të deputetëve dhe strukturave lokale të PS-së.
Mersini u shpreh se është një privilegj i veçantë të jetë gruaja e parë që përfaqëson Partinë Socialiste në garën për drejtimin e Bashkisë së Vlorës.

Në fjalën e saj, ajo theksoi se synimi kryesor do të jetë zhvillimi modern i qytetit, përmes bashkëpunimit me qytetarët dhe garantimit të transparencës në çdo vendimmarrje.

“Do të punoj me përkushtim për një qytet më të zhvilluar, më bashkëkohor dhe më afër qytetarëve”, – deklaroi Mersini.

Ndryshimet në drejtimin e bashkive vijnë pas një sërë dorëheqjesh dhe riorganizimesh në nivel vendor. Në Cërrik, Andis Hasalla është emëruar Ministër i Bujqësisë, ndërsa në Vlorë Ermal Dredha dha dorëheqjen pas kritikave publike nga kryeministri Rama.
Në Tiranë, ndërkohë, Erion Veliaj u shkarkua nga Këshilli Bashkiak me urdhër të kreut të qeverisë.