Gjykata e Fierit ka vendosur masën e sigurisë “burg pa afat” për Altin Kukën, dy djemtë e tij Ervis dhe Emaurisio Kuka, si dhe bashkëpunëtorin Tomor Zyka, në lidhje me vrasjen e dyfishtë të ndodhur disa ditë më parë në Kurjan të Roskovecit. Vëllezërit Gramos dhe Lavdimir Kurtaj u vranë me armë zjarri pas një konflikti që përfshinte një prej djemve të Kukës.

Fillimisht, për ngjarjen u arrestua Altin Kuka, por hetimet e mëtejshme zbuluan se ai nuk kishte vepruar vetëm. Zyrtarisht, policia njoftoi se në vrasjen e vëllezërve Kurtaj ishin përfshirë edhe dy djemtë e tij, Ervis dhe Emaurisio. Gjatë përpjekjes për t’u arratisur, këtyre të fundit iu gjet një armë pistoletë nga policia.

Në vendin e ngjarjes janë zbuluar vetëm gëzhoja të automatikut, arma që Altin Kuka dorëzoi vullnetarisht në komisariat pas kryerjes së krimit. Arma do t’i nënshtrohet ekspertizës për të përcaktuar kush i vrau konkretisht vëllezërit Kurtaj, edhe pse vrasjen e ka marrë përsipër Altin Kuka. Ngjarja dyshohet se nisi pas një konflikti të çastit mes fëmijëve të familjeve të autorëve dhe viktimave.