Një sasi e paaktivizuar lënde plasëse artizanale është gjetur sot në qytetin e Burrelit. Sipas njoftimit të policisë vendore, lënda e dyshuar për plasëse është gjetur në lulishten e lagjes “Pjetër Budi”, ku një pako e vogël është konstatuar nga autoritetet. Ajo është dyshuar të përmbante një lëndë plasëse artizanale, e cila ende nuk ishte aktivizuar.

Për të siguruar mjedisin dhe për të parandaluar ndonjë incident, shërbimet e specializuara xheniere kanë nisur verifikimin dhe do të heqin lëndën plasëse për shpërthim të kontrolluar. Për këtë arsye, është krijuar një perimetër sigurie në zonë.

“Nga shërbimet e specializuara xheniere, po bëhet verifikimi për përmbajtjen e pakos dhe më pas heqja e saj”, thuhet në njoftim.Një perimetër sigurie është krijuar me qëllim marrjen e lëndës plasëse dhe shpërthimit të kontrolluar të saj, për të shmangur ndonjë incident.

Grupi hetimor në drejtimin e Prokurorisë, vijon punën për zbardhjen e plotë të rrethanave të këtij rasti, si dhe për identifikimin dhe kapjen e autorit apo autorëve.

Fillimisht u njoftua në disa media se alarmi për bombë ishte dhënë në Burgun e Burrelit, por vetë institucioni doli publikisht me një reagim, ku sqaroi se nuk ishte e vërtetë.

“Në lidhje me lajmet që po qarkullojnë në media për një alarm për bombë në Burgun e Burrelit, ju informojmë se ky lajm nuk është i vërtetë. Pranë Institucionit të Ekzekutimit të Vendimeve Penale (IEVP) Burrel nuk ka pasur asnjë alarm të tillë”, thuhet në njoftimin zyrtar të Burgjeve.