SPAK ka përfunduar hetimet dhe ka dërguar për gjykim Jorgo Goron, ish-kryebashkiakun e Himarës, nën akuzat për shpërdorim detyre dhe falsifikim dokumentesh. Hetimi u krye në kuadër të procedimit penal Nr. 189, vitit 2023, ku akuzat përfshijnë:
– Shpërdorimi i detyrës
– Falsifikimi i dokumenteve
– Falsifikimi i vulave dhe stampave
– Mosdeklarimi i pasurive
Akuzat
– Jorgo Goro** akuzohet për shpërdorim detyre dhe mosdeklarim të pasurive, duke dërguar dokumente të falsifikuara për regjistrim në ZVRPP Vlorë.
– Jerasimo Bash*, ish-drejtor i Menaxhimit dhe Mbrojtjes së Tokës, është akuzuar gjithashtu për shpërdorim detyre.
– Bilbil Aliaj dhe Vezir Gjikokaj, ish-drejtorë të ZVRPP-së, janë akuzuar për shpërdorim detyre për lëshimin e dokumenteve të falsifikuara.
– Stavri Mëhilli akuzohet për falsifikim dokumentesh dhe pastrim të produkteve të veprës penale.
Detaje të Shtesë
1. Episodi i parë: Goro dhe Bashi dërguan dokumente me të dhëna të rreme për regjistrimin e pasurive.
2. Episodi i dytë: Ata konfirmuan një plan rilevimi me informacione të gabuara për pasuritë, duke e shkelur ligjin.
3. Sekuestrim: Pasuritë e krijuara nga veprat e paligjshme janë vendosur nën sekuestro preventive.
Në lidhje me të pandehurin Stavri Mëhilli, nga hetimi penal ka rezultuar plotësisht e provuar se ky shtetas ka përdorur më shumë se një herë dy formularë të falsifikuar. I pandehuri ka paraqitur kërkesë pranë Bashkisë Himarë, më datë 11.03.2019, me objekt “Regjistrimin e pronave të tij që i disponon me AMTP në vendin e quajtur “Llangadhaqa” dhe “Perivolo”, kundrejt ligjeve në fuqi”. Bashkëngjitur kërkesës, i pandehuri ka bashkëngjitur Aktin e Marrjes së Tokës në Pronësi Nr. 9677, datë 07.02.1994, i cili është provuar të jetë i falsifikuar në përmbajtje, në pjesën që lidhet me pasurinë Nr. 36/36/1, ndodhur në Perivolo, me sipërfaqe 5512 m2, e llojit “Truall”. Po kështu, ky formular (AMTP), referuar aktit të ekspertimit teknik – grafik Nr. 5227, datë 20.06.2023, të kryer nga ana e Institutit të Policisë Shkencore Tiranë, ka rezultuar të jetë i falsifikuar në nënshkrimin e shtetasit K. Gj., Kryetar i Komisionit dhe nënshkrimin e shtetasit M. Gj., Përfaqësues i Rrethit në Komision. Ky akt rezulton të jetë ai bazë, i përdorur gjatë gjithë procedurës së regjistrimit të pasurisë. I pandehuri Stavri Mëhilli, provohet të ketë paraqitur dhe përdorur një formular tjetër i cili është provuar të jetë i falsifikuar. Bëhet fjalë për Formularin Nr. 6 (Lista e Familjeve që morën tokë në pronësi), fshati Gjilek, Rrethi Vlorë.
Në këtë formular të paraqitur dhë përdorur nga i pandehuri, i cili ka shërbyer si dokument bazë për regjistrimin e pasurisë të identifikuar me numër 36/36/1, i cili përmban të dhëna të rreme në lidhje me sipërfaqen prej 5512 m2, nga akti i ekspertimit është provuar të jetë i falsifikuar nënshkrimi i shtetasit K. Gj., Kryetar i Komisionit të tokës në fshat. Përdorimi i këtyre dy formularëve përfshin të gjithë procedurën e ndjekur, duke nisur nga Bashkia Himarë për të përfunduar tek ASHK-ja Vlorë.
Përveç këtyre dy formularëve, i pandehuri Stavri Mëhilli provohet të ketë përdorur më shumë se një herë edhe dy dokumenta të tjerë të falsifikuar, konkretisht shkresën Nr. 1492/2 Prot., datë 22.07.2019, dhe shkresën Nr. 1492/1, Prot., datë 22.07.2019. Këto dokumenta të falsifikuara, rezulton të jenë përdorur pranë Prokurorisë së Shkallës së Parë të Juridiksionit të Përgjithshëm Vlorë, si edhe pranë noteres S. H., e cila ka përpiluar kontratën “Premtim Shitje”, me Nr. Rep. 836; Nr. Kol. 559, datë 25.07.2019.
I pandehuri Stavri Mëhilli, provohet gjithashtu të ketë shitur pasurinë e përfituar nga kryerja e veprave penale sipas nenit 186/2 e 190/2, të Kodit Penal, duke qenë në dijeni të plotë të prejardhjes kriminale të saj. Transaksioni është realizuar kundrejt përfitimit financiar dhe transferimi i pasurisë është bërë me qëllim fshehjen e origjinës së paligjshme, formë objektive kjo e kryerjes se veprës penale, e parashikuar në gërmën “a” të paragrafit të parë të nenit 287, të Kodit Penal.
