Deputeti i Partisë Demokratike, Saimir Korreshi, ka bërë humor gjatë seancës së Komisionit të Ligjeve, ku po shqyrtohet projektligji “Për parandalimin e konfliktit të interesave në ushtrimin e funksioneve publike”.

Me ironi, Korreshi ngriti pyetje të pazakonta, duke marrë shembull dhurimin e dy qenve nga një mik i tij: “Ta pyes, më dhuroi dy qen si deputet apo si Saimir?” Ai shtoi se sipas tij, edhe “çështjet e krevatit” mund të përbëjnë konflikt interesi, duke ironizuar mbi situata të përditshme që ligji mund të prekë.

“Kam nja dy pyetje konkrete, se duhet sqaruar konflikti i interesit… Dje më dhuroi një shok im dy qenë. Gruaja nuk do që të shkojë me mua, por me deputetin që jam unë. Edhe këtu do të hyjmë! Të shkoj në krevat. Po lëre tani! A është konflikt ky?”, tha Korreshi, duke nxitur të qeshura në sallë.

Batutat e tij nuk u kursyen nga kolegët dhe të pranishmit, ndërsa ai përdori shembuj humoristikë për të ironizuar mbi situatat që ligji i propozuar synon të rregullojë.