Drejtuesi i fushatës së Partisë Demokratike, Chris LaCivita, mbajti një fjalim të fuqishëm dhe provokues gjatë hapjes së fushatës së PD-së, duke shprehur mbështetje për Sali Berishën dhe duke kritikuar ashpër qeverisjen socialiste në Shqipëri.

LaCivita, duke u ndalur te situata politike në SHBA dhe duke bërë një paralelizëm me Shqipërinë, theksoi se socialistët dështuan në përpjekjet për të burgosur Donald Trump, dhe paralajmëroi se ata po përpiqen të ndërmarrin të njëjtën gjë me opozitën shqiptare, por do të dështojnë sërish:

“Kush është gati për ta bërë Shqipërinë madhështore sërish? Në vitin 2024, në SHBA socialistët u përpoqën të burgosnin Donald Trump, dështuan. Në 2025, këtu në Shqipëri, socialistët duan të burgosin të gjithë opozitën, por do të dështojnë.”

LaCivita nuk ngurroi të kritikojë as regjimin e Edi Ramës, duke e akuzuar atë për 12 vite të dështimit ekonomik, krimit dhe drogës:

“Pse? Sepse nuk kanë çfarë të thonë për 12 vitet e fundit, 12 vite krim dhe drogë. Dhe për 12 vjet, mbi 1 milion shqiptarë janë larguar nga Shqipëria.”

Në fund, ai i bëri thirrje qytetarëve të bëjnë një zgjedhje të ndryshme, duke e nxitur popullin të mbështesë Sali Berishën dhe të kthejnë shpresën për një të ardhme më të mirë:

“Pse të votosh për një parti që ka krijuar të tëra problemet? Votoni për dr. Berishën. Jepini vendit tuaj një mundësi dhe jepuni shpresë.”

Fjalimi i Chris LaCivita reflekton angazhimin e fushatës për të rikthyer Shqipërinë në rrugën e zhvillimit dhe stabilitetit, duke e prezantuar Sali Berishën si liderin që mund të sjellë ndryshimin e nevojshëm.