Në mbledhjen e Grupit Parlamentar të Partisë Demokratike (PD) sot, disa deputetë kanë kërkuar shkarkimin e Kryetares së Komisionit të Arsimit dhe Medias, Flutura Açka, me argumentin se ajo nuk përfaqëson në mënyrë adekuate interesat e grupit parlamentar dhe pengon punën e deputetëve të opozitës. Deputetët kanë ngritur shqetësime se Açka ndërmerr më shumë aksione kundër opozitës sesa kundër qeverisë dhe ministrave të saj të korruptuar.
Kritikat e Deputetëve ndaj Flutura Açkës
Sipas burimeve, deputetët kanë argumentuar se Açka:
– Nuk përmbush rolin e opozitës.
– Nuk vepron në përputhje me vendimet e grupit parlamentar.
– Pengon nismat opozitare në Komision.
– Nuk reagon ndaj sulmeve të Edi Ramës ndaj medias.
– Nuk pranon kërkesat për të thirrur në dëgjesë Ministrinë e Arsimit.
– Nuk bashkëpunon për të mbajtur përgjegjëse Ministrinë e Kulturës për gjendjen e institucioneve të trashëgimisë kulturore.
– Pengoi votimin e kërkesës së opozitës për trajtimin në Komision të sjelljes së Edi Ramës ndaj drejtuesve të emisionit Rai 3.
– Nuk ka asnjë qëndrim për çështjet e mbuluara nga komisioni.
– Nuk është prezentë në 80% të mbledhjeve të Komisionit.
Qëndrimi i Gazment Bardhit
Kryetari i Grupit Parlamentar të PD, Gazment Bardhi, ka kundërshtuar propozimin për shkarkimin e Açkës.
Mirëkuptoj faktin e shqetësimit që ngritën kolegët këtu që Flutura është aty me besimin e grupit parlamentar, është propozim i grupit. Po ai është pozicion për grupin parlamentar të PD. Mirëpo përpara se ne të hedhim një hap, duhet të bëjmë gjithçka që çdo deputet i PD të angazhohet më shumë në aksionin opozitar në Parlament.
Nuk dua të them që i vë në dyshim vërtetësinë e tyre, por më duhet të vlerësoj më në detaje shkaqet që u ngritën këtu. Prandaj nuk mendoj se duhet të bëjmë ndonjë propozim për shkarkim në këtë moment. Kryetari i Partisë të hënën, por edhe kryesia e partisë, folën për dorën e shtrirë të bashkimit me këdo që deri me sot ka menduar ndryshe nga ne. Nuk mendoj që grupi ynë parlamentar duhet të ketë një qëndrim të kundërt me këtë.
Pra dorë e shtrirë, jo përjashtim, jo hatërmbetje, jo shkarkime. Më mirëkuptoni, por nuk mund ta pranoj propozimin tuaj. Mund ti kthehemi kësaj teme ndoshta në ndonjë mbledhje tjetër”, tha Bardhi.
