Zëvendëspresidentja e Venezuelës, Delcy Rodríguez, ka kërkuar publikisht kthimin e presidentit Nicolas Maduro, duke e cilësuar atë si “të vetmin” president legjitim të vendit, në një fjalim të transmetuar nga televizioni shtetëror venezuelian.

Në deklaratën e saj, Rodríguez akuzoi drejtpërdrejt Shtetet e Bashkuara se kanë nisur një “agresion ushtarak të paprecedentë”, duke e cilësuar këtë veprim si një “njollë të tmerrshme në zhvillimin e marrëdhënieve dypalëshe” mes dy vendeve. Sipas saj, qëllimi i Uashingtonit është i qartë: ndryshimi i regjimit në Venezuelë.

Ajo theksoi se pas këtij skenari fshihet edhe interesi për pasuritë natyrore të vendit.
“Ky ndryshim regjimi do të lejonte gjithashtu sekuestrimin e burimeve tona energjetike, minerare dhe natyrore. Ky është objektivi i vërtetë dhe bota dhe komuniteti ndërkombëtar duhet ta dinë këtë. Nëse ka një gjë për të cilën populli venezuelian dhe ky vend janë të sigurt. Është se ne nuk do të jemi më kurrë skllevër, se nuk do të jemi më kurrë koloni e asnjë perandorie, çfarëdo qoftë natyra e saj”, deklaroi Rodríguez.

Fjalimi i saj vjen në një moment tensionesh të larta pas sulmeve ushtarake amerikane në territorin venezuelian dhe mes paqartësive mbi fatin e presidentit Maduro. Autoritetet në Karakas vijojnë të denoncojnë ndërhyrjen si shkelje të sovranitetit kombëtar, ndërsa komuniteti ndërkombëtar po ndjek nga afër zhvillimet në vend.