Ngjarja tronditëse në Kretë të Greqisë, ku një fëmijë shqiptar rreth 7 vjeç humbi jetën teksa po notonte në plazhin pranë shtëpisë së tij, ka tronditur komunitetin e zonës së Arvit. Fëmija, i identifikuar si Nikolasi, i kishte kërkuar nënës së tij leje që të shkonte të notonte me një shok, por ajo kishte refuzuar. Duke i ikur nga vëmendja nënës, i mituri ishte futur në det, ku dallgët e kishin marrë dhe për pasojë ai kishte humbur ndjenjat. Një banor i zonës e gjeti fëmijën të pajetë në ujë dhe ngriti menjëherë alarmin.

Banorët e tjerë u mobilizuan për t’i dhënë ndihmën e parë, por fatkeqësisht ishte tepër vonë për ta shpëtuar. Mediat greke bëjnë me dije se Nikolasi, me origjinë nga Shqipëria, jetonte me prindërit e tij në Arvi prej disa vitesh. Prindërit e tij janë punëtorë kryesisht në serra dhe janë përshkruar nga bashkëfshatarët si njerëz të shkëlqyer.

Të gjithë flasin për një fëmijë të mrekullueshëm, plot energji, gëzim dhe mirësi. Nëna e tij, e cila pak muaj më parë solli në jetë fëmijën e dytë të familjes, ishte në shtëpi me foshnjën në momentin që ndodhi tragjedia, ndërsa babai i tij ishte në punë. Trishtimi dhe dhimbja janë të mëdha për këtë humbje të madhe në komunitetin e Arvit.