Vlorë – Dhoma e Avokatisë në Vlorë ka reaguar me tone të forta ndaj situatës që po vijon prej muajsh në Gjykatën e Apelit të Juridiksionit të Përgjithshëm dhe Gjykatën e Apelit Administrativ, ku mijëra çështje kanë mbetur të bllokuara, duke lënë qytetarët dhe bizneset pa asnjë zgjidhje ligjore.

Në një deklaratë zyrtare, avokatët e cilësojnë këtë situatë si një “dështim të hapur institucional” dhe “kolaps të sistemit të drejtësisë”, duke ia faturuar përgjegjësinë Këshillit të Lartë Gjyqësor (KLGJ).

Sipas tyre, mungesa e gjyqtarëve, sallave gjyqësore dhe masave konkrete nga KLGJ kanë sjellë pasoja shkatërruese për aksesin në drejtësi.

“Familje të tëra, biznese, individë që presin prej vitesh vendime për fatin e tyre juridik, janë viktima të një sistemi të bllokuar nga paaftësia dhe keqmenaxhimi i KLGJ-së”, thuhet në deklaratën e Dhomës së Avokatisë Vlorë.

Akuzat kryesore ndaj KLGJ
• Gjykatat e Apelit janë kthyer në simbol të kolapsit, ku vonesat janë bërë rregull, jo përjashtim.
• KLGJ nuk ka ndërmarrë asnjë masë të prekshme për garantimin e funksionimit minimal të gjykatave.
• Çdo ditë vonesë përbën shkelje të të drejtave të njeriut dhe dhunim të parimit kushtetues për gjykim brenda një afati të arsyeshëm.
• Harta e re gjyqësore, në vend që të sillte eficiencë, ka thelluar më tej krizën.

Thirrja për masa emergjente

Dhoma e Avokatisë Vlorë i bën thirrje KLGJ-së të ndërhyjë menjëherë duke rritur numrin e gjyqtarëve dhe duke siguruar shqyrtimin e shpejtë të çështjeve të mbetura pezull.

“Çdo vonesë tjetër është e pajustifikueshme dhe vetëm sa thellon dëmin ndaj qytetarëve dhe vetë rendit juridik”, theksohet në reagim.

Avokatët paralajmërojnë se nëse KLGJ vijon të qëndrojë pasiv, do të mbajë mbi vete “barrën e përgjegjësisë historike për kolapsin e drejtësisë në Shqipëri”.