Momente prekëse janë regjistruar gjatë ceremonisë së lamtumirës për ish-kryeministrin Fatos Nano, ku bashkëshortja e tij, Xhoana Nano, mbajti një fjalë të mbushur me emocione dhe dhimbje të thellë.

Me lot në sy dhe zë të dridhur, ajo përshkroi ditën e sotme si më të errëtën dhe më të trishtuarën e jetës së saj.

“Të dashur miq dhe dashamirës, i nderuar kryeministër. Dita e sotme është dita më e errët dhe e trishtuar e jetës. Po ndahem me njeriun që kalova çerek shekulli, me njeriun që më lidhën, përveç dashurisë, shumë ëndrra, shpresa dhe zhgënjime të përbashkëta,” — tha ajo me emocion.

Në fjalimin e saj, Xhoana kujtoi fillimet e dashurisë me Fatos Nanon, duke e përshkruar si një ndjenjë që lindi jo vetëm për njeriun, por edhe për vizionin e tij për një Shqipëri moderne dhe evropiane.

“Këtu e çerek shekulli më parë unë, një vajzë e re, rashë në dashuri me Fatosin. Atëherë nuk e kuptoja pse, por tani e di. Kisha rënë në dashuri, jo vetëm me Fatosin si njeriun, por edhe me vizionin e tij për një Shqipëri ndryshe, që duhej të largohej nga barbaria dhe hakmarrjet, dhe të futej në një kurs civil, modern dhe evropian. Këto i gjeta tek Fatosi.”

Ceremonia në Pallatin e Kongreseve u mbush me duartrokitje, lot dhe emocione, teksa figura e Fatos Nanos u kujtua si një simbol i ndryshimit dhe i epokës së tranzicionit politik shqiptar.