Muhamet Çota, babai i Anjeza Shikos, drejtoreshës së tatimeve në Vlorë, ka rrëfyer momentin e frikshëm kur makinën e vajzës së tij e ka përfshirë flaka.

Ngjarja ndodhi mbrëmjen e kaluar rreth orës 22:15, në një garazh në lagjen ‘1 Maj’ të qytetit bregdetar. Ai tregon se nga kamerat e sigurisë është regjistruar një person i maskuar dhe me kapele duke hyrë në garazh dhe duke hedhur benzinë mbi makinën e familjes, për t’u larguar pastaj nga vendi i ngjarjes.

Çota shton se një komshi i lajmëroi pasi vuri re tym në garazh, ndërsa ata menjëherë njoftuan policinë dhe zjarrfikësit për të shuar flakën.

.“Ngjarja mund të ketë ndodhur mbrëmë rreth orës 22:15. Në kamerat e sigurisë pashë që diskush kishte hyrë në garazh, i maskuar, me kapele dhe kapuç gri, hodhi benzinën e vuri flakën. Mbaroi punë e u kthye andej nga hyri. Neve na njoftoi një komshi që kishte parë tym në garazh. Morëm kovën me ujë të fiknim zjarrin edhe njoftuam policinë dhe zjarrfikësit”– u shpreh Çota.

Ndërkohë, ai shpreh dyshimin se ngjarja mund të ketë ndodhur për shkak të detyrës, por ende nuk ka një version zyrtar për shkakun e zjarrvënies.