Lufta ajrore e Rusisë ndaj Ukrainës prej vitesh ka sjellë pasoja të rënda përtej kufijve ukrainas. Raketat, bombat ajrore dhe dronët kanë shkaktuar viktima në Ukrainë, ndërsa në një masë më të kufizuar, incidentet kanë prekur edhe vendet fqinje të Evropës Qendrore dhe Juglindore.

Por së fundmi, kërcënimi po afrohet gjithnjë e më shumë pranë Moldavisë dhe Rumanisë, ku pothuajse çdo ditë regjistrohen incidente me dronë. Disa prej tyre kanë shpërthyer dhe janë raportuar edhe persona të plagosur.

Në javët e fundit janë shtuar gjithashtu sulmet ndaj pikave ukrainase të kontrollit kufitar me Moldavinë dhe Rumaninë. Për shumë vëzhgues, intensifikimi i këtyre incidenteve ngre dyshime se nuk bëhet më fjalë për raste të izoluara, por për një strategji të qëllimshme të Kremlinit për ta afruar konfliktin me territorin e dy vendeve fqinje.

Droni që vonoi avionin e Zelenskyt

Një nga incidentet më të fundit, të martën, më 8 shtator 2026, shkaktoi reagime të forta pasi një dron rus depërtoi në hapësirën ajrore të Moldavisë dhe më pas në atë të Rumanisë.

Sipas të dhënave të bëra publike, bëhej fjalë për një dron të tipit të ri Geran, i pajisur me motor reaktiv dhe me shpejtësi që mund të arrijë deri në 500 kilometra në orë.

Droni u nis në orët e vona të pasdites nga Krimea e pushtuar nga Rusia. Ai hyri fillimisht në hapësirën ajrore të Moldavisë dhe më pas në atë të Rumanisë, përpara se të ndryshonte papritur drejtim dhe të rikthehej në hapësirën ajrore moldave.

Në veri të Moldavisë, pranë lokalitetit Rîșcani, droni u rrëzua në një fushë me luledielli dhe shpërtheu.

Trajektorja e fluturimit ka ngritur pikëpyetje të forta, pasi sipas vëzhguesve, lëvizjet e tij mund të tregojnë për një manovër të qëllimshme.

Megjithatë, raportimet se avioni i presidentit ukrainas Volodymyr Zelensky “u godit për pak” nuk rezultuan të sakta. Droni u rrëzua rreth 160 kilometra në veri të Aeroportit Ndërkombëtar të Kishinaut.

Pavarësisht distancës, trajektorja e tij kaloi nëpër një pjesë të madhe të territorit moldav, duke iu afruar për një periudhë edhe kryeqytetit Kishinau. Më pas, ai kaloi pranë qytetit rumun Iași.

Për shkak të incidentit, hapësira ajrore e Moldavisë u mbyll për rreth një orë, ndërsa aeroportet e Kishinaut dhe Iașit pezulluan përkohësisht operacionet.

Edhe avioni me presidentin ukrainas në bord, i cili po udhëtonte drejt Oslos, u nis me vonesë.

Moldavia, e pambrojtur ndaj sulmeve ajrore

Incidenti nxori në pah edhe një tjetër problem serioz: kapacitetet e kufizuara të Moldavisë për mbrojtjen e hapësirës së saj ajrore.

Droni u zbulua dhe u ndoq nga sistemet e monitorimit ajror, por autoritetet nuk patën mundësi ta rrëzonin.

Sipas të dhënave publike, Moldavia disponon vetëm një numër të kufizuar raketash kundërajrore polake Piorun, të cilat mund të përdoren, në rastin më të mirë, për mbrojtjen e objekteve të caktuara.

Rritja e incidenteve me dronë pranë Moldavisë dhe Rumanisë po shton shqetësimin se lufta në Ukrainë mund të ketë pasoja gjithnjë e më të drejtpërdrejta për sigurinë e vendeve fqinje.