Mamaja 23-vjeçare ka nënshkruar një moment të përzemërt ku shfaqet duke përqafuar të voglin e saj, i cili ishte nën kujdesin e gjyshërit për një javë, ndërsa ata nuk pranonin t’i kthejnë atë. Përmes kësaj fotografie, gruaja shpreh ndjenjën e lehtësimit pasi pas një jave të ankthit, tani mund të ketë të voglin në praninë e saj. Pas një jave tërheqjesh dhe emocionesh, ai është rikthyer në shtëpi me nënën e tij.

Policia e Durrësit ka arrestuar Bahrije Gjuni, gjyshen e 3-vjeçarit të zhdukur në Durrës. Ajo pranoi të dorëzonte sot djalin në polici, ndërsa është arrestuar nën akuzën e rrëmbimit të personit.

Para policisë, ajo ka dëshmuar edhe për vendndodhjen e tij gjatë ditëve që e kishte marrë me vete dhe ishte larguar nga banesa e saj. Pasi u shoqërua për në stacion, gjyshja është arrestuar dhe i janë vënë prangat.

Kërkimet për të voglin filluan më 16 prill, kur mamaja e tij denoncoi zhdukjen dhe rrëmbimin e tij nga gjyshërit. U bënë kërkime në disa qytete dhe u kontrolluan 15 banesa në zonën e Krumës.

Ndërkohë, në pranga u vu gjyshi Rexhep Gjuni, 60 vjeç, dhe Arben Selaj, vëllai i gjyshes së 3-vjeçarit. Në kërkim mbetet vëllai tjetër i gjyshes, Flamur Selaj, 43 vjeç.

Gjyshja pretendon se dy vëllezërit e saj nuk kanë patur rol në këtë ngjarje të ndodhur.

“E kemi vendosur sëbashku me bashkëshortin tim Rexhepin ta merrnin nipin e ta rrisnim vetë sepse ai është djali i djalit tonë. Në këtë mënyrë të shtunën që shkoi e morëm dhe unë u largova nga shtëpia dhe u nisa për në fshatin tim në Gjinaj të Krumës te prindërit e mi. Atje kam fjetur një natë. Ditën tjetër kam shkuar te Vendi i Mirë në fshatin Buzmadh të Kukësit. Në Buzmadh kam fjetur një natë. Ditën e tretë kam shkuar në Kukës te një kushërira ime ku kam fjetur një natë. Pastaj kam shkuar në Tiranë ku kam fjetur në 4 hotele të ndryshme”, ka dëshmuar ajo.”Vendosa ta dorëzoj nipin për shkak të ndjekjes së policisë por edhe se një vëlla i imi u arrestua e një tjetër është shpallur në kërkim pasi ata nuk kanë gisht në këtë çështje”, ka deklaruar gjyshja.