Të tjera detaje janë zbardhur në lidhje me krimin e rëndë të ndodhur në Rodopi të Greqisë, ku 53-vjeçari Bujar Meço, me origjinë nga Gramshi, dyshohet se vrau me thikë bashkëshorten e tij, Esma Meço, 44 vjeçe, dhe më pas tentoi t’i jepte fund jetës.

Sipas raportimeve të mediave greke, çifti ishte ndarë kohët e fundit. 44-vjeçarja, e cila punonte sezonalisht jashtë Rodopit, ishte kthyer në fshat për të festuar ditëlindjen e vajzës së saj 16-vjeçare.

Por kthimi në banesën familjare përfundoi në tragjedi.

Sipas informacioneve të publikuara nga mediat greke, 53-vjeçari dyshohet se e ka goditur gruan në qafë me thikë, duke i shkaktuar plagë fatale.

Pas krimit, Bujar Meço dyshohet se është vetëplagosur dhe më pas ka konsumuar naftë, në përpjekje për t’i dhënë fund jetës.

Në momentin e ngjarjes, vajza 16-vjeçare ndodhej në banesë, por në një dhomë tjetër. Ishte pikërisht ajo që telefonoi autoritetet dhe njoftoi se babai i saj kishte sulmuar nënën.

Esma Meço u dërgua në spital nga djali i saj, por mjekët nuk mundën ta shpëtonin, pasi kishte ndërruar jetë si pasojë e plagëve.

Ndërkohë, 53-vjeçari u transportua në spital, ku ndodhet i shtruar dhe, sipas raportimeve, është jashtë rrezikut për jetën.

E kishte denoncuar për kërcënim në vitin 2022

Sipas të dhënave të bëra publike nga mediat greke, mes çiftit kishte pasur probleme edhe më herët.

Në vitin 2022, Esma Meço kishte denoncuar bashkëshortin e saj për kërcënim. Pas denoncimit, Bujar Meço ishte arrestuar dhe ishte dërguar përpara autoriteteve gjyqësore.

Tashmë, autoritetet greke po hetojnë rrethanat e plota të ngjarjes, historikun e marrëdhënies së çiftit dhe motivin që çoi në krimin e rëndë.