Një krim tronditës ka goditur shtetin e Teksasit, ku një 15-vjeçar vrau tre anëtarë të një familjeje, në atë që policia e cilëson si një akt hakmarrjeje pas ndarjes nga e dashura e tij.

Ngjarja u regjistrua të martën, më 9 dhjetor, në Odessa, ku trupat e pajetë të Jennifer Rodriguez, 39 vjeçe, vajzës së saj 13-vjeçare dhe djalit 9-vjeçar, u gjetën brenda apartamentit luksoz të familjes, pas njoftimeve për të shtëna.

Hetuesit thanë se autori, i cili ishte në një marrëdhënie me vajzën tjetër të Rodriguez, të mitur po 15 vjeçe, nuk e kishte pranuar dot ndarjen dhe kishte planifikuar fillimisht ta qëllonte atë jashtë shkollës. Më pas kishte ndryshuar plan dhe ishte drejtuar drejt banesës së familjes, ku kreu vrasjen e trefishtë.

Adoleshenti ia mbathi nga vendngjarja, por u arrestua 40 minuta më vonë. Policia ka sekuestruar një armë pranë apartamentit, që dyshohet të jetë përdorur në krim, ndërsa po hetohet edhe mënyra se si i riu e ka siguruar atë.

Babai i tre fëmijëve, i ndarë nga Rodriguez, është shprehur se është “i shkatërruar” nga tragjedia, duke theksuar se “kurrë nuk do ta kishte imagjinuar një ngjarje të tillë”.

15-vjeçari po përballet me akuzën për vrasje të shumëfishtë dhe ndodhet në paraburgim. Edhe pse Teksasi ka dënimin me vdekje, ai nuk aplikohet për të miturit.