Deputeti i Partisë Demokratike, Edi Paloka, ka konfirmuar se aksioni opozitar do të vazhdojë në ditët në vazhdim.

Ai shprehu se qëllimi i aksionit të sotëm ishte bllokimi i disa akseve rrugore, duke theksuar: “Siç e kemi deklaruar prej ditësh, qëllimi i aksionit të sotëm është bllokimi i disa akseve rrugore. Do të vazhdojmë të bllokojmë rrugët. Atë që kemi deklaruar prej ditësh, atë kemi bërë dhe atë do bëjmë. Qëllimi i sotëm është bllokimi i akseve.”

Në përputhje me këtë strategji, protestuesit kanë bllokuar rrugën tek mbikalimi i Shkozetit dhe, përveç bllokimit, kanë djegur goma si formë proteste. Situata është e ngjashme edhe në akset e tjera ku opozita ka realizuar bllokime rrugësh, duke theksuar qëndresën e tyre ndaj qeverisë.