Kryeministri Edi Rama ka bërë një thirrje të drejtpërdrejtë përmes rrjeteve sociale, duke ftuar qytetarët që ende nuk kanë votuar, të dalin dhe të ushtrojnë të drejtën e tyre në kutitë e votimit.

Në një video të transmetuar “live” nga ajo që ai e quajti “komanda e përgjithshme” — vendi ku mblidhen të dhënat mbi ecurinë e procesit zgjedhor — Rama theksoi rëndësinë e votës si një akt jo vetëm qytetar, por edhe shoqëror dhe patriotik.

“Është e domosdoshme që vota të hidhet, të mblidhet, të numërohet dhe që ti që mund të votosh të mos mungosh,” deklaroi kreu i qeverisë. Ai u bëri thirrje qytetarëve që të votojnë me qetësi, durim dhe sipas bindjeve të tyre politike.

Mesazhi vjen në orët e fundit të procesit të votimit, me qëllim rritjen e pjesëmarrjes në zgjedhjet parlamentare të 11 majit.