Vlora është përfshirë sot nga një bllokim i rëndë trafiku, duke krijuar kaos të vërtetë në qarkullimin rrugor dhe duke penguar seriozisht qytetarët që përpiqen të arrijnë në qendrat e votimit.

Shkak për këtë situatë është bërë zhvillimi i etapës shqiptare të garës ndërkombëtare të biçikletave “Giro d’Italia”, që ka sjellë mbylljen e disa rrugëve kryesore në qytet. Edhe pse eventi sportiv po zhvillohet në një atmosferë festive, efektet e tij anësore kanë komplikuar ndjeshëm procesin zgjedhor.

Qytetarët raportojnë se kanë mbetur të bllokuar për orë të tëra në rrugët hyrëse dhe dalëse të Vlorës, ndërsa radhët e gjata të automjeteve dhe mungesa e rrugëve alternative kanë sjellë vështirësi të mëdha për të arritur në qendrat e votimit.

Mungesa e koordinimit mes autoriteteve vendore dhe organizatorëve të eventit sportiv ka ngritur shqetësime për ndikimin e kësaj situate në pjesëmarrjen zgjedhore në qytet.