Nemesio Oseguera Cervantes, i njohur si “El Mencho”, lider i Cartel Jalisco Nueva Generación, humbi jetën pas një operacioni të forcave meksikane të sigurisë më 20 shkurt, pas viteve në kërkim ndërkombëtar.
Sipas autoriteteve meksikane, informacionet e inteligjencës çuan në identifikimin e vendndodhjes së tij në një kompleks kabinash pranë Tapalpës. Sekretari i Mbrojtjes, Ricardo Trevilla Trejo, deklaroi se hetimet mbi rrjetin e Osegueras ndihmuan në depërtimin drejt rrethit të tij të ngushtë.
Operacioni u zhvillua kryesisht me forca tokësore dhe me mbështetje të kufizuar ajrore, për të shmangur dyshimet. Presidentja Claudia Sheinbaum bëri të ditur se SHBA ndau informacione inteligjence, por nuk pati përfshirje të trupave amerikane në terren.
Gjatë ndërhyrjes pati shkëmbim zjarri me anëtarët e kartelit. Tetë prej tyre u vranë dhe dy ushtarë mbetën të plagosur. Oseguera u largua fillimisht drejt një zone pyjore, por u gjet më pas nga forcat speciale. Pas një përplasjeje tjetër, ai dhe dy truprojat e tij u arrestuan të plagosur rëndë. Sipas autoriteteve, ata humbën jetën gjatë transportimit me helikopter drejt spitalit.
Vdekja e tij shkaktoi trazira në disa zona të Meksikës, me barrikada, djegie automjetesh dhe përplasje me forcat e sigurisë. Autoritetet raportuan viktima edhe mes efektivëve të Gardës Kombëtare, ndërsa disa fluturime u pezulluan për arsye sigurie.
Oseguera ishte shpallur nga SHBA si terrorist global me përkatësi të veçantë dhe për kapjen e tij ishte ofruar një shpërblim prej 15 milionë dollarësh. Hetimet mbi rrjetin e kartelit vijojnë.
