Elon Musk, njeriu më i pasur në botë, ka deklaruar se komiteti politik që ai ka themeluar për të mbështetur ish-presidentin Donald Trump do të dhurojë 1 milion dollarë çdo ditë deri në ditën e zgjedhjeve, me qëllim që të rritet numri i votuesve republikanë të regjistruar në shtetet kyçe të garës presidenciale. Musk u angazhua që çdo person që nënshkruan një peticion online për të shtuar votuesit republikanë do të ketë shansin të fitojë një shumë prej 1 milion dollarësh.
Kreu ekzekutiv i Tesla nuk humbi kohë dhe ka dhënë çekun e parë prej 1 milion dollarësh një votuesi republikan në Pensilvani, një burri të quajtur John Dreher. Fituesit e 1 milion dollarëve do të zgjidhen çdo ditë përmes shorteut nga ata që kanë nënshkruar peticionin dhe janë regjistruar si votues.
Në këtë peticion, votuesit – qofshin demokratë apo republikanë – japin të dhënat e tyre, duke përfshirë emrin, mbiemrin, numrin e telefonit dhe detaje të tjera. Ky event do të zgjasë deri në ditën e zgjedhjeve, dhe pritet që Musk të financojë një total prej 17 milionë dollarësh për të nxitur pjesëmarrjen e votuesve dhe për të ndihmuar në rikthimin e Trump në Shtëpinë e Bardhë.
Gjatë tre muajve të fundit, Elon Musk ka dhuruar 75 milionë dollarë në mbështetje të fushatës së Donald Trump, sipas të dhënave të zbuluara nga autoritetet federale. Musk, që prej vitit 2002 kur mori nënshtetësinë amerikane, kishte deklaruar më parë se ishte votues demokrat, por këtë vit ka shprehur hapur mosbesimin e tij ndaj Presidentit aktual Joe Biden dhe ka zgjedhur të mbështesë Trump, sidomos pas një atentati që pretendohet se ndodhi ndaj tij në korrik.
Musk dhe Trump kanë dalë publikisht së bashku në një event në Butler, Pensilvani, në fillim të këtij muaji, duke konfirmuar lidhjen e tyre politike. Donacionet e Musk për republikanët e rreshtojnë atë mes donatorëve më të mëdhenj për rikthimin e Donald Trump në Shtëpinë e Bardhë, duke përfshirë emra si bankieri Timothy Mellon dhe miliarderen e kazinove Miriam Adelson.
