Ministrja e Shëndetësisë dhe Mbrojtjes Sociale, Evis Sala, prezantoi sot dy emërime të rëndësishme në shëndetësi: Anxhela Paparizo si drejtoreshë e re e Qendrës Spitalore Universitare “Nënë Tereza” dhe Arti Papajani si drejtor i Fondit të Sigurimit të Detyrueshëm të Kujdesit Shëndetësor (FSDKSH).

Paparizo merr drejtimin e QSUT pas dorëheqjes së ish-deputetit Florenc Spaho, i cili drejtoi institucionin për dy muaj. Ajo rikthehet në Shqipëri pas 17 vitesh në diasporë dhe sjell mbi 20 vite eksperiencë në administratë publike, si në Kanada, ashtu edhe në Shqipëri, në role menaxheriale dhe drejtuese.

Ndërkohë, Papajani pason Spartak Zekjan në drejtimin e FSDKSH-së. Ai ka përfunduar studimet në Financë-Kontabilitet, Matematikë të Aplikuar e Informatikë, si dhe Menaxhim Shëndetësor, duke sjellë një eksperiencë të gjatë në administratën publike.

Ministrja Sala u shpreh se këto emërime synojnë forcimin e menaxhimit dhe eficiencës në sistemin shëndetësor dhe një qasje më të mirë ndaj shërbimeve për qytetarët.