Një i ri shqiptar, Enriko Allkushi, 23 vjeç, është arrestuar dhe dënuar me 14 muaj burg nga gjykata britanike, pasi u zbulua i përfshirë në kultivimin e kanabisit në një ish-parukeri në Bucknall New Road, Hanley.

Policia britanike zbuloi të riun të fshehur në papafingon e objektit, ku u gjetën 50 bimë kanabisi së bashku me pajisje të sofistikuara për rritjen dhe kultivimin e drogës. Gjatë marrjes në pyetje, Allkushi deklaroi se ishte dërguar aty nga dy shqiptarë që kishte njohur në Londër, duke pohuar se kishte vepruar nën ndikimin dhe udhëzimet e tyre.

Gjatë seancës gjyqësore, gjykatësi Graeme Smith u shpreh: “Kjo është një situatë që e shohim shpesh në këtë gjykatë. Droga shkatërron jetë dhe shpesh njerëzit që ndodhen në vend ilegalisht përfshihen në këtë aktivitet për të siguruar të ardhura të paligjshme, duke qenë të vetëdijshëm për pasojat ligjore.”

Gjykata urdhëroi gjithashtu konfiskimin dhe asgjësimin e bimëve dhe pajisjeve të kultivimit të kanabisit. Ky rast është një tjetër shembull i përfshirjes së emigrantëve të parregullt në aktivitete të paligjshme për shkak të mungesës së mundësive të ligjshme për punësim. Autoritetet britanike po vijojnë hetimet për të identifikuar dhe ndjekur penalisht personat e tjerë të përfshirë në këtë rrjet.