Vullkani Etna, në ishullin italian të Siçilisë, shpërtheu sërish këtë të diel, duke nxjerrë një re të madhe hiri vullkanik dhe duke shkaktuar kufizime të përkohshme në fluturimet e Aeroportit të Katanias.

Sipas Institutit Kombëtar Italian të Gjeofizikës dhe Vullkanologjisë (INGV), aktiviteti vullkanik nisi në orët e para të mëngjesit dhe u intensifikua gradualisht, duke krijuar një kolonë hiri që u ngrit rreth 1.5 kilometra mbi krater.

Për shkak të resë së hirit, autoritetet aeroportuale vendosën kufizime të përkohshme në hapësirën ajrore, ndërsa meteorologët parashikuan se ajo do të vijojë të lëvizë drejt jugut.

Me një lartësi prej rreth 3,300 metrash, Etna është një nga vullkanet më aktivë në botë dhe njihet për shpërthimet e shpeshta, të shoqëruara me rrjedha lave dhe emetime të mëdha hiri vullkanik.