Kandidati i pavarur për Bashkinë e Tiranës, Florjan Binaj, mbajti sot konferencën e tij të parë për mediat, pas një takimi me koordinatorët e partive opozitare, duke shprehur optimizëm për fitoren dhe rëndësinë e bashkëpunimit të krijuar.

Binaj theksoi se, edhe pse nuk do të shfaqet publikisht pranë liderëve opozitarë, ai nuk përjashton takimet me ta gjatë fushatës.

“Ky është takimi i parë i një serie që na pret në ditët në vijim. Falë mbështetjes së të gjithë partive të opozitës, i bëj thirrje qytetarëve të bashkohen pa dallim partie. Ky bashkim tregon shumë për atë që pritet të ndodh,” u shpreh kandidati.

Ai shtoi se po punon me një ekip jopartiak për të përgatitur programin për të gjithë qytetarët, duke theksuar se në terren do të jetë pa kryetarët e partive, por i gatshëm të takojë çdo lider opozitar.