Mariupoli vijon prej ditësh të jetë kryeqendra e luftimeve mes trupave ruse dhe atyre ukrainase, që kanë hyrë në ditën e 28 të përballjes së tyre.

Qyteti është kthyer në një gjendje të mjerueshme, ku qindra civilë janë vrarë, mijëra janë larguar ndërsa dëmet materiale janë të pallogaritshme.

Në orët e fundit, raportohet se rusët kanë hyrë në Mariupol të mbështetur nga separatistët e Donbasit, megjithatë inteligjenca amerikane pohon se ushtria ukrainase do të kundërpërgjigjet dhe nuk do e le qytetin në duart e pushtuesve.

Burime nga Pentagoni bëjnë me dije se forcat vendase po rifitojnë terren në jug dhe pikërisht pranë qytetit Kherson, aty ky qytetarët kanë sfiduar frikën dhe prej disa ditësh kanë dalë në protesta kundër rusëve. Të njëjtët burime konfirmojnë se deri tani nuk ka të dhëna për ndonjë sulm të mundshëm me armë kimike nga ana e rusëve.

Presidenti Zelensky bëri një tjetër dalje në rrjetet sociale ku deklaroi se negociatat me palën ruse vazhdojnë dhe fajësoi ushtrinë e saj se ka penguar karvanin me ndihma humanitare që i ishte drejtuar Mariupolit.