Ministri gjerman i Mbrojtjes, Boris Pistorius, ka mbërritur në Estoni për të marrë pjesë në ceremoninë zyrtare të dorëzimit të komandës së forcave tokësore të NATO-s në Estoni dhe Letoni te Korpusi gjermano-holandez.

Ceremonia pritet të zhvillohet në qytetin Valga, në kufirin mes Estonisë dhe Letonisë, ndërsa Pistorius mbërriti një ditë më parë në qytetin Tartu.

Sipas Ministrisë gjermane të Mbrojtjes, ky zhvillim përfaqëson një hap të rëndësishëm në forcimin e pranisë së NATO-s në krahun lindor dhe rritjen e përgjegjësive të Gjermanisë dhe Holandës në strukturat e aleancës.

Korpusi gjermano-holandez do të ketë përgjegjësinë për drejtimin e stërvitjeve ushtarake dhe koordinimin e mbrojtjes së Estonisë dhe Letonisë në rast konflikti, rol që deri më tani ushtrohej nga selia e NATO-s në Poloni.

Ky vendim është pjesë e planit të miratuar në samitin e NATO-s në vitin 2023 për forcimin e mbrojtjes kolektive në rajonin baltik.