Në datën 12 nëntor 2024, nën/drejtoresha e Shkollës “Sotir Gurra” në Korçë ka njoftuar nënën e njërës prej vajzave të mitura, e cila, pasi është vënë në dijeni dhe ka mësuar përmbajtjen e mesazheve, është paraqitur në ambientet e komisariatit të Korçës dhe ka depozituar kallëzim penal. Në kallëzim, nëna ka deklaruar se mësuesi i Arteve Pamore (vizatim), Bledar Duro, ka ngacmuar seksualisht vajzën e saj, nxënëse në shkollën 9-vjeçare “Sotir Gurra”, përmes mesazheve në aplikacionin “WhatsApp”.
Pasi u njoftua për ngjarjen, nëna ka shpjeguar se më 12 nëntor 2024, rreth orës 13:30, është informuar nga Nëndrejtoresha dhe Psikologia e Shkollës, të cilat i kanë komunikuar se vajza e saj dhe shoqja e saj janë ngacmuar seksualisht nga mësuesi i tyre i Arteve Pamore përmes mesazheve në aplikacionin “WhatsApp”.
Sipas këtyre mesazheve, komunikimi kishte nisur me tema të lidhura me artin dhe pikturën, por më pas mësuesi kishte kërkuar nga vajzat që të preknin pjesët intime të trupit të tyre, duke kryer një veprim të papranueshëm dhe të papërgjegjshëm.
Në pasojat e këtyre zhvillimeve, policia ka kryer veprimet e para hetimore, duke filluar me intervistimin e të miturave në prani të prindit, psikologes, punonjëses sociale dhe avokatit të caktuar nga policia. Gjithashtu, është realizuar pyetja e nën/drejtoreshës së shkollës për të ndihmuar në hetimet e mëtejshme.
Bledar Duro ka deklaruar sot se : “…Unë jam përdorues i rregullt alkooli dhe për këtë gjendje i jam nënshtruar rehabilitimit në QSUT mbi dhjetë herë. Kam qenë në gjendje të dehur dhe nuk kujtoj, nëse kam zhvilluar biseda me karakter ngacmues të dy nxënësve…”
Pjesë e hetimeve është bërë gjithashtu këqyrja e telefonave të viktimave dhe të personit të dyshuar, Bledar Duro, ku janë verifikuar bisedat e dërguara përmes aplikacionit “WhatsApp”. Sipas ekspertëve kriminalistë, këto biseda janë një provë e rëndësishme në hetimin e rastit.
Nesër Bledar Duro do të dalë para gjykatës së Korçës, për tu njohur me masën e sigurisë “arrest në burg” që ka kërkuar përfaqësuesi i akuzës.
